tumhain khonay se darta hon : poet aatif saeed

عاطف سعید

کہا تھا ناں

مجھے تم اِس طرح سوتے ہوئے مت چھوڑ کر جانا

مجھے بےشک جگا دینا

بتا دینا

محبت کے سفر میں ساتھ میرے چل نہیں سکتیں

تمہیں رستہ بدلنا ہے

مری حد سے نکلنا ہے

تمھیں کس بات کا ڈر تھا

تمھیں جانے نہیں دیتا

کہیں پہ قید کر لیتا

ارے پگلی

محبت کی طبیعت میں زبردستی نہیں ہوتی

جسےرستہ بدلنا ہو، اُسے رستہ بدلنے سے

جسے حد سے نکلنا ہو، اُسے حد سے نکلنے سے

نہ کوئی روک پایا ہے

نہ کوئی روک پائے گا

تمھیں کس بات کا ڈر تھا

مجھے بے شک جگا دیتیں

میں تم کو دیکھ ہی لیتا

تمھیں کوئی دعا دیتا

کم از کم یوں تو نہ ہوتا

مرے ساتھی حقیقت ہے

تمہارے بعد کھونے کے لئے کچھ بھی نہیں باقی

مگر کھونے سے ڈرتا ہوں

میں اب سونے سے ڈرتا ہوں

عاطف سعید

*************