Malik Habib

نام : ملک حبیب اللہ 

تاریخ پیدائش: 9 جولائی 1986

جائے پیدائش : چوآسید ن شاہ ضلع چکوال

موجودہ شہر:  اسلام آباد 

کالج دور سے ہی پنجابی کے اشعار کہتے رہے ہیں لیکن باقاعدہ طور پر اس میدان میں 2012 سے ہیں۔

جَب میں اپنے آپ پر اِفشا ہُوا

شوق قَطرے سے بَڑھا دَریا ہُوا

ہوش کا سامان رُخصت ہو گیا

عَقل نے آہیں بَھریں یہ کیا ہُوا۔؟

آگہی کا راز جَب مُجھ پر کُھلا

یہ جَہاں آیا نَظر دیکھا ہُوا

طُور کِس کارن جَلا کچھ یاد ہے

شوق جب حَد سے بَڑھا شعلہ ہُوا

کُنتُ کَنزاً کا لِبادہ اوڑھ کر

کون تجھ میں چُھپ کے تھا بیٹھا ہُوا

عِشق میں خَلوت کے مَعنی کُھل گئے

سَب میں رہ کر آج جَب تَنہا ہُوا

خُون سے دِل کی زَمیں سیراب کی

تَب کَہیں جا کر یہ گُل پیدا ہُوا

عالمِ وارفتگی میں اے حَبیب

بارہا خود سے مِرا جَھگڑا ہُوا

*************

اَرضِ ہَستی کے کِناروں کو ہِلایا جائے 

حَشر ایسا بھی کِسی روز اُٹھایا جائے

جادۂ منزلِ حَسرت کا ہُوں واقف مُجھ کو

وادئ یاس کے رَستے میں بَسایا جائے

کِس طَرح گَرمئ تُربت میں سَکوں پائیں گے

غَم کے ماروں کو کَہیں اور سُلایا جائے

ضَبط کو توڑ نہ پائیں کَبھی آنسُو اِن کو

دَرد کی آخری پَرتوں میں چُھپایا جائے

ایک عالم کی نِگاہیں یہ تَماشہ دیکھیں

یُوں سَرِ دار مُجھے کِھینچ کے لایا جائے

میرے اِحساس نے سُولی پہ چَڑھایا مُجھ کو

میرے اِحساس کو سُولی پہ چَڑھایا جائے

اِس طَرح جان لُٹائی ہے تُمہاری خاطر

جیسے لُوٹی ہوئی دولت کو لُٹایا جائے

اے حبیب آؤ زمانے کے اُجالے دیکھیں

کَب تَلک سوگ محبت کا مَنایا جائے

*************

بزمِ ہستی میں عَجب اَنجمن آرائی ہے 

دَرد لے کر تِرے کُوچے کی ہَوا آئی ہے

بُوئے جاناں نے مِری زات یوں مَہکائی ہے 

رَقص کرتا ہے بَدن خَلق تَماشائی ہے

خود کو دیکھا تو تِرا نَقش دِکھا ہے ہَمدم

میری ہَستی میں تِری ذات یُوں دَر آئی ہے

مَنصب و جاہ مُبارک تُمہیں دُنیا والو

میری قِسمت میں اِسی دَر کی جَبیں سائی ہے

یہ جو اِک شخص دَریچے سے لَگا بیٹھا ہے 

تیرا رُسوا ہے اِجازت کا تَمنائی ہے

آ غَمِ یار تِرے ساتھ گُزاروں لَمحے 

شَب کی خاموشی ہے اور عالمِ تَنہائی ہے

اے حَبیب اُس کے خیالوں میں زَمانہ گُزرا 

تَب کَہیں جا کے مُحبت نے ضِیا پائی ہے

*************

وہ ظاہر ہے پَسِ خلوت نہیں ہے

نظر آتا ہے بے صورت نہیں ہے

مُحیطِ ذات سے نکلا تو دیکھا

جُدا مجھ سے تری صورت نہیں ہے

ہے پِنہاں ایک دریا میرے اندر

یہاں اشکوں کی کچھ قِلت نہیں ہے

مری آنکھوں کو گویائی ملی ہے 

مجھے لفظوں کی اب حاجت نہیں ہے

وفا کے نام سے ڈرتے ہو کیونکر

یہ سُنت ہے میاں بِدعت نہیں ہے

تمہاری بے نیازی پر بھی چُپ ہوں

وہ پہلی سی مِری حالت نہیں ہے

مِرے حِصے کی خوشیاں بانٹ ڈالو

غموں سے ہی مجھے فُرصت نہیں ہے

مجھے کچھ ضبط کرنا پڑ رہا ہے

وگرنہ یہ مری عادت نہیں ہے

دِل مُضطر کی بیتابی کا بدلہ

مرے مولا فقط جنت نہیں ہے

حبیب اِک شور سے اب واسطہ ہے

سکوں کی آجکل عادت نہیں ہے

*************

اب گناہ و ثواب بِکتے ہیں 

مان لیجے جناب بِکتے ہیں

میری آنکھوں سے آ کے لیجاؤ

ان دکانوں پہ خواب بِکتے ہیں

پہلے پہلے غَریب بِکتے تھے

اب تو عِزت مآب بِکتے ہیں

بے ضَمیروں کی راج نِیتی میں

جاہ و منصب خطاب بِکتے ہیں

شیخ،واعظ ،وزیر اور شاعر

سب یہاں پر جَناب بِکتے ہیں

دَور تھا اِنقلاب آتے تھے

آج کل انقلاب بِکتے ہیں

دِل کی باتیں حبیب جُھوٹی ہیں

دِل بھی خانہ خراب بِکتے ہیں

*************

دِل کی لَگی کو آج بُجھانے نِکل پَڑے 

ہم خواب بیچنے کے بَہانے نِکل پَڑے

آنکھیں کِسی خیال کی دُنیا میں کھو گئیں

تب اشک اُن کو ہوش دِلانے نِکل پَڑے

جِن کے گھروں کو ہم نے بَچایا تھا آگ سے

وہ لوگ گَھر ہَمارا جلانے نِکل پَڑے

مُدت کے بعد شہر میں آیا ہے کچھ سکوں

تُم پھِر سے اس میں آگ لگانے نِکل پَڑے

وحدت کی بات سنتے ہی سب مُفتیانِ شہر

کافر سمجھ کے ہم کو جَلانے نِکل پَڑے

راتیں کَٹی تِھیں گِریہ و زاری میں جِس جَگہ

سُنتے ہیں اب وہاں سے خَزانے نِکل پَڑے

ہم سے ہی روشنی کو عَداوت رَہی حَبیب

ہم چل بَسے تو دِن بھی سُہانے نِکل پَڑے

*************

ملک حبیب