Ammar Iqbal

نام:عمار اقبال

تاریخِ پیدایش:25.02.88

جائے پیدائش:کراچی

شہر کانام:کراچی

شعری سفر: 2010-11

کتاب: پرندگی

دل سے اترے تو شان سے اترے

جیسے ہم آسمان سے اترے

گھات میں بھی لگائے بیٹھا ہوں

کب شکاری مچان سے اترے

باتوں باتوں میں رات کٹ جائے

ایک بالی نہ کان سے اترے

عمار اقبال

*************

جو بچی ہے گزار دوں ؟ اچھا!

زندگی تجھ پہ وار دوں ؟ اچھا!

اور تو کچھ نہیں ہے میرے پاس

خواب ہیں،مستعار دوں؟ اچھا!

آزما لوں تجھے وفا پیکر

تجھ کو راہِ فرار دوں؟ اچھا!

صبر کو تقویت ملے گی کیا؟

جبر کو اختیار دوں ؟ اچھا!

تم سنو اور ان سنی کر دو

میں صدا بار بار دوں؟ اچھا!

عمار اقبال

*************

میں کا عالم ہے تُو کا عالم ہے

درمیاں کیا ہے؟ ھُو کا عالم ہے

مجھ سے مایوس تو نہیں ہے تو

یعنی لَا تَقْنَطُوْا کا عالم ہے

اس کا احساس اور محسوسات

جا بجا رنگ و بُو کا عالم ہے

اب ہیں بے تاب ویسے زندانی

اور نہ وہ جستجو کا عالم ہے

ایک عالم درونِ دل عمار

اور وہی چار سو کا عالم ہے

عماراقبال

*************

رنگ و رس کی ہوس اور بس

مسئلہ دسترس اور بس

یوں بُنی ہیں رگیں جسم کی

ایک نس ٹس سے مس اور بس

سب تماشائے کن ختم شد

کہہ دیا اس نے بس اور بس

کیا ہے مابینِ صیاد و صید

ایک چاکِ قفس اور بس

اس مصور کا ہر شاہکار

ساٹھ پینسٹھ برس اور بس

عمار اقبال

*************

میں نے چاہا تھا زخم بھر جائیں

زخم ہی زخم بھر گئے مجھ میں

عمار اقبال

*************