jo dard tu ne dia har khushi se barh kar hai : poet syed ali salman

سید علی سلمان

جو درد تو نے دیا ہر خوشی سے بڑھ کر ہے

تری عطا تو مری تشنگی سے بڑھ کر ہے

ترے فراق کا دکھ کیا ہے اس کی شدت کیا

بس ایک کرب ہے جو خود کشی سے بڑھ کر ہے

وہ بات کیسے چھپائیں جو چھپ نہیں سکتی

بتائیں کیسے جو شرمندگی سے بڑھ کر ہے

تُو مہر و ماہ کا قائل ہے میں ترا قائل

کہ تیرا نور ہر اک روشنی سے بڑھ کر ہے

کمی تو کچھ بھی نہیں پھر بھی سوچتا ہوں میں

تری کمی مجھے ہر اک کمی سے بڑھ کر ہے

میں اس کے سامنے ہتھیار ڈال سکتا ہوں

یہ دشمنی ہے تو پھر دوستی سے بڑھ کر ہے

فنا کے بعد بھی ان سے ملیں گے ہم سلمان

کہ ان سے پیار ہمیں زندگی سے بڑھ کر ہے

سید علی سلمان

*************

Ansu rotay hain barish main : poetess rida fatima

آنسو روتے ہیں بارش میں

سپنے بہتے ہیں بارش میں

ٹوٹے گھر کے باسی اب بھی

صدمے سہتے ہیں بارش میں

کومل جذبے رکھنے والے

پاگل ہوتے ہیں بارش میں

پورے دل میں رہنے والے

آدھے رہتے ہیں بارش میں

سندر پھولوں کی بستی میں

موتی اگتے ہیں بارش میں

جیون کو اپنانے والے

باغی لگتے ہیں بارش میں

اوروں کے دکھ چننے والے

درد پروتے ہیں بارش میں

زندہ ہم کو دِکھنے والے

کیونکر مرتے ہیں بارش میں

اب تک مجھ کو ملنے والے

غم کیوں رستے ہیں بارش میں

ردا فاطمہ

*************

meri tham tham javay sans piya : poet zain shakeel

زین شکیل

مری تھم تھم جاوے سانس پیا

مری آنکھ کو ساون راس پیا

تجھے سن سن دل میں ہوک اٹھے

ترا لہجہ بہت اداس پیا

ترے پیر کی خاک بنا ڈالوں

مرے تن پر جتنا ماس پیا

تُو ظاہر بھی، تُو باطن بھی 

ترا ہر جانب احساس پیا

تری نگری کتنی دور سجن

مری جندڑی بہت اداس پیا

میں چاکر تیری ازلوں سے

تُو افضل، خاص الخاص پیا

مجھے سارے درد قبول سجن

مجھے تیری ہستی راس پیا

زین شکیل

*************

tumhain khonay se darta hon : poet aatif saeed

عاطف سعید

کہا تھا ناں

مجھے تم اِس طرح سوتے ہوئے مت چھوڑ کر جانا

مجھے بےشک جگا دینا

بتا دینا

محبت کے سفر میں ساتھ میرے چل نہیں سکتیں

تمہیں رستہ بدلنا ہے

مری حد سے نکلنا ہے

تمھیں کس بات کا ڈر تھا

تمھیں جانے نہیں دیتا

کہیں پہ قید کر لیتا

ارے پگلی

محبت کی طبیعت میں زبردستی نہیں ہوتی

جسےرستہ بدلنا ہو، اُسے رستہ بدلنے سے

جسے حد سے نکلنا ہو، اُسے حد سے نکلنے سے

نہ کوئی روک پایا ہے

نہ کوئی روک پائے گا

تمھیں کس بات کا ڈر تھا

مجھے بے شک جگا دیتیں

میں تم کو دیکھ ہی لیتا

تمھیں کوئی دعا دیتا

کم از کم یوں تو نہ ہوتا

مرے ساتھی حقیقت ہے

تمہارے بعد کھونے کے لئے کچھ بھی نہیں باقی

مگر کھونے سے ڈرتا ہوں

میں اب سونے سے ڈرتا ہوں

عاطف سعید

*************

kya zarurat hai hello haye ki : poetess haya ghazal

حیاء غزل

کیا ضرورت ہے ہیلو  ہا ئے کی

میں نہیں ہوں تمہارے پائے کی

دھوپ کا لطف لینے والی ہوں

مجھکو خواہش نہیں ہے سائے کی

غا ئبا نہ  شریک  کر کے تمہیں

ایک چسکی بھری ہے چائے کی

اک محبت نہیں  و گرنہ  تو

گھر میں ہر چیز ہے کرائے کی

مشورہ مفت جو  د یا ہے   اسے

کوئ وقعت نہیں ہے را ئے کی

مستقل کس کا  ہے قیام یہاں

دنیا بھی ہے جگہ  سرائے کی

حیاء غزل

*************

milay jo muskura kr usko apna maan letay hain : poet mohammad yousaf

محمد یوسف

ملے جو مسکرا کر اس کو اپنا مان لیتے ہیں

دلاسہ دے کوئی اس کو مسیحا جان لیتے ہیں

طبیعت نہ ہو مائل جس پہ وہ ہر گز نہیں کرتے

مگر کر کے دکھاتے ہیں جو دل میں ٹھان لیتے ہیں

کوئی خوش ہی نہیں ہے جب ہمارا فائدہ کر کے

تو پھر ہم کیوں کسی کا مفت میں احسان لیتے ہیں

کبھی جو اپنے پیاروں پہ کوئی الزام آ جائے

تو ہم ایسے میں مجرم خود کو ہی گردان لیتے ہیں

 ہدف اپنی نگاہوں سے کوئی بھی بچ نہیں پاتا

خطا ہوتا نہیں جس پر نشانہ تان لیتے ہیں

نہیں کرتے کبھی حالات کا شکوہ، گلہ یوسف

جو مل جائے اسی کو بس غنیمت جان لیتے ہیں

محمد یوسف

*************

main gardaab e iseyan ka maara hon ya rab : poet khalil rehman khalil

محمد خلیل الرحمٰن خلیل

میں گردابِ عصیاں کا مارا ہوں یا رب

مگر نام تیرا ہی لیتا ہوں یا رب

مجھے پھر دکھا دے وہ پیارا سا کعبہ

اگرچہ گنہگار بندہ ہوں یا رب

بہت بے بسی نے مجھے آ لیا ہے

بنا بے کسی کا میں چہرہ ہوں یا رب

مرا ناتواں دل ہوا غم سے بوجھل

فقط مانگتا اک سہارا ہوں یارب

ترے نام لیوا پہ آلام بھاری

عطا کر سکوں اب میں ہارا ہوں یا رب

گناہوں کی عادت سے آیا ہوں عاجز

ہدایت عطا کر میں اندھا ہوں یارب

مجھے در بدر کا نہ محتاج کرنا

تجھے چاہتا ہوں میں تیرا ہوں یارب

طلب میں بسر ہو جو باقی ہے رہتی

بڑا بحرِ عصیاں میں ڈوبا ہوں یارب

خلیل اب تو رو رو کے کہہ دے خدا سے

مجھے بخش دے در پہ آیا ہوں یارب

محمد خلیل الرحمٰن خلیل

*************

deevangi ka hum pe jo ilzaam hai to ho : poet ishtiaq zain

اشتیاق زین

دیوانگی کا ہم پہ جو الزام ہے، تو ہو

چرچا یہ ہر زباں پہ سرِ عام ہے، تو ہو

تقدیسِ عشق میں ہمیں منظور تشنگی

لبریز خواہشوں کا اگر جام ہے، تو ہو

لکھا ہے جو نصیب میں، ملتا ہے بس وہی

بے نام گر حیات کا انجام ہے، تو ہو

مجھ کو عزیز جاں سے ہیں تیرے یہ رنج و غم

نغمہ جو اب خوشی کا سرِ بام ہے، تو ہو

سینچیں گے ہر کلی کو جگر کے لہو سے ہم

گلشن میں گر جو کام یہ بدنام ہے، تو ہو

بدلوں گا خو وفا کی، کسی طور بھی نہ میں

شامل جو عاصیوں میں مرا نام ہے، تو ہو

اے یارِ خوش خرام، تری کج روی کی خیر

میرے لئے یہ موجبِ آلام ہے، تو ہو

گر چل پڑے ہیں زینؔ تو رکنا فضول ہے

اب راستے میں غم کی اگر شام ہے، تو ہو

اشتیاق زین

*************

meri mitti ko de rutba isay tu keemiya kar de : poetess jeena qureshi

میری مٹی کو دے رتبہ اسے تو کیمیا کر دے 

ابھی تو عین پر ہوں میں ، مجھے تو انتہا کر دے

چڑھاؤں کوئی نذرانہ کہاں اوقات میری ہے 

مری پلکوں سے آنسو چن ، کوئی جود و سخا کر دے

مجھے جو ہجر بخشا ہے تو کچھ توفیق بھی دے دے 

تماشا ہی نہ ہو جاؤں مجھے صبر و رضا کر دے 

ارادت مند ہوں تیری تری چوکھٹ پہ بیٹھی ہوں 

دکھا جلوہ مجھے مرشد مری ہستی فنا کر دے 

ملے لذت جبیں کو پھر جو میں مٹی پہ سررکھ دوں 

دیا جو درد ہے تو نے تو ہی اس کی دوا کر دے 

ابھی تو بارگاہ -عشق میں سولی بھی چڑھنا ہے 

لگا مجھ پر کوئی فتویٰ مجھے مجھ سے جدا کر دے

جینا قریشی

*************

muhabbat pesh ghar ghar kar raha hon : poet ain umar

عین عمر

محبت پیش گھر گھر کررہا ہوں

میں تقلیدِ قلندر کر رہا ہوں

کہ دو گز کی عمارت کے لیے میں

اکٹھے اینٹ پتھر کر رہا ہوں

اداکاری اداکاروں کا فن ہے

مگر ان سے میں بہتر کر رہا ہوں

میں اسکو چھوڑ کر اک داستاں میں

حساب اپنا برابر کر رہا ہوں

یقیناََ کر چکی ہوگی زمیں بھی

ستم جو جو زمیں پر کر رہا ہوں

عین عمر

*************

sans lena mahaal hai saien : poet sajid javed sajid

ساجد جاوید ساجد

سانس  لینا  محال   ہے  سائیں

عشق جاں  کا  وبال  ہے  سائیں

مجھ  کو  سپنا  عجیب   آتا   ہے

خود کشی بھی حلال ہے سائیں

آنکھیں اس کی غزال جیسی ہیں

زلف ریشم  کا  جال  ہے  سائیں

قیس لیلیٰ  پہ مر  مٹا  دل  سے

آپ    اپنی   مثال    ہے   سائیں

مجھ سے نظریں چُرا رہا ہے  دل

غم  میں  اتنا  نڈھال  ہے  سائیں

روپ  رب  کا  لگے ہے مکھڑا وہ

اس کی صورت کمال  ہے  سائیں

عشق  جس   پر   تمام   ہوتا   ہے

ایک    حبشی   بلالؓ   ہے   سائیں

ساجد جاوید ساجد

*************

to phir yeh teh hai k dono man rabta rahay ga : poet zubyr qaisar

زبیر قیصر

تو پھر یہ طے ہے کہ دونوں میں رابطہ رہے گا

تمام عمر محبت کا سلسلہ رہے گا

 سمے کی دھول سے اٹ بھی گیا یہ عکس اگر

تمھارے نام کا ہاتھوں میں آئینہ رہے گا

عجیب اب کے سفر پاؤں سے بندھا ہوا ہے

کہ رستہ کٹ بھی گیا پھر بھی فاصلہ رہے گا

ہٹا بھی دی گئی تصویر تیری دیکھنا تم

مجھے یقیں ہے وہ دیوار دیکھتا رہے گا

کیا ہے جرم تو پھراعتراف کیوں نہ کروں

سزا زمانے سے دل خود ہی پوچھتا رہے گا

میں نفرتوں کی صلیبوں پہ کھینچا جاؤں گا

ہر عشق والا مرا دار چومتا رہے گا

یہ دشت ِ خواب عجب ایک آئینہ خانہ

کہ جو بھی آیا یہاں خود کو دیکھتا رہے گا

یہ دیکھنا ہے وہ کب تک چرائے گا نظریں

ہمارا نام تو دیوار پر لکھا رہے گا

 ابھی تو کہتا ہے دیوانے کی یہ باتیں ہیں 

وہ میرے شعر مرے بعد چومتا رہے گا

تمھارے بعد خبر دل کے موسموں کی مجھے

کوئی نہ کوئی یہاں پیڑ سوکھتا رہے گا

یہ ایک خواب سلامت رہے مرے مولا

یہ آئینہ ذرا ٹوٹا تو ٹوٹتا رہے گا

زبیر قیصر

*************

itni veeran zindgi meri : poet rehman raja

رحمان راجہ

اتنی ویران زندگی میری

رات میں جیسے ہو گلی میری

تھورا ہی دور تھا میں منزل سے

اور پھر رُک گئی گھڑی میری

کیا کہا اُس نے ؟ بس وہ میری ہے؟

سچ بتاو نا ؟ واقعی میری؟

پاوں رکھو جو باغ میں تم بھی

کھل اُٹھے گی یہ ہر کلی میری

رحمان راجہ

*************

bas tawajja hi ki nahi jati : poet yawar azeem

یاور عظیم

بس توجّہ ہی کی نہیں جاتی

خامشی کب سُنی نہیں جاتی

خواب کی نشریات آنے تک

آنکھ کی سنسنی نہیں جاتی

وقت کی کوکھ میں اندھیرا ہے

روشنی کیوں جنی نہیں جاتی

جب ہوائیں مرے موافق ہوں

مجھ سے پرواز کی نہیں جاتی

مامتا کے محل میں رہتا ہوں

میری شہزادگی نہیں جاتی

یہ محبت ہے زائد المیعاد

زہر لگتی ہے، کی نہیں جاتی

دُھوپ شرمندہ ہو گئی یاورؔ 

پُھول کی تازگی نہیں جاتی

یاور عظیم

*************

yeh baat alag hai sab majzoob samjhtay hain : poet sada hussain sada

صدا حسین صدا

یہ بات الگ ہے سب مجذوب سمجھتے ہیں

مطلب کے تعلق کو ہم خوب سمجھتے ہیں

دنیا ہو کہ جنت  ہے اِنعام انہی کا ہی

محبوبِ خدا کو جو محبوب سمجھتے ہیں

اغیار سے بھی بد تر ہیں رُوپ میں اپنوں کی

جو لوگ شریعت کو معیوب سمجھتے ہیں

تم درس محبت کا دو جا کے کہیں اور ہی

ہم عشق کے مارے ہر اسلوب سمجھتے ہیں

ہر شعر میں ڈھالا ہے کچھ ایسے ترا پیکر

اب لوگ تجھے مجھ سے منسوب سمجھتے ہیں

تم لاکھ دلیلیں دو جدّت کی صداؔ پر ہم

تہذیب کے باغی کو آشوب سمجھتے ہیں

صدا حسین صدا

*************

main sach kahon pas e deevar jhoot boltay hain : imran aami

عمران عامی

میں سچ کہوں پس ِ دیوار جھوٹ بولتے ہیں 

مرے خلاف مرے یار جھوٹ بولتے ہیں 

ملی ہے جب سے اِنہیں بولنے کی آزادی 

تمام شہر کے اخبار جھوٹ بولتے ہیں 

میں مر چکا ہوں مجھے کیوں یقیں نہیں آتا 

تو کیا یہ میرے عزادار جھوٹ بولتے ہیں

یہ شہر ِعشق بہت جلد اُجڑنے والا ہے 

دُکان دار و خریدار جھوٹ بولتے ہیں 

بتا رہی ہے یہ تقریب ِ منبر و محراب 

کہ متقی و ریاکار جھوٹ بولتے ہیں 

میں سوچتاہوں کہ دم لیں تو میں اِنہیں ٹوکوں

مگر یہ لوگ لگاتار جھوٹ بولتے ہیں 

ہمارے شہر میں عامی منافقت ہے بہت

مکین کیا، در و دیوار جھوٹ بولتے ہیں

عمران عامی

*************

gham se do chaar ho chuka hon main : poet haroon afghan

ہارون افغان

غم سے دو چار ہو چکا ہوں میں

سب سے بی زار ہو چکا ہوں میں

کو بہ کو ڈھونڈتا ہوں میں اس کو

در بہ در خوار ہو چکا ہوں میں

کوئی تو حال پوچھنے آوے

سخت بیمار ہو چکا ہوں میں

دوست اب مجھ سے جو نہیں ملتے

ان پہ کیا بار ہو چکا ہوں میں ؟

پہلے میں بھی گلاب سنبل تھا

اور اب خار ہو چکا ہوں میں

ہارون افغان

*************

jungle ki khilafat jo muje sonp gya hai : poet umair qureshi

عمیر قریشی

جنگل کی خلافت جو مجھے سونپ گیا ہے

وہ شخص محبت میں قلندر بھی رہا ہے

بگڑے ہوئے خالات ہیں گردش میں ستارے

ابتک جو بچاتی رہی وہ ماں کی دعا ہے

لے جا کے میں دیکھوں گا وہاں اپنا سفینہ

سورج یہ سمندر میں کہاں ڈوب رہا ہے

خوشبو سے معطر ہے مرا پورا سراپا 

اک شخص کی قربت نے مجھے پھول کیا ہے

وہ حلقہءِ احباب میں شامل بھی نہیں تھا

جس شخص نے مشکل میں مرا ساتھ دیا ہے

مرتے ہوئے سائے نے مجھے اتنا بتایا

گرتی ہوئی دیوار نے یہ کام کیا ہے

عمیر قریشی

*************

hamesha dard ki shiddat bahaal rakhta tha : poetess shahnaz shazi

شہناز شازی

ہمیشہ درد کی شدت بحال رکھتا ہے

وہ دل دکھانے میں ایسا کمال رکھتا ہے

شگفتگی کبھی ضرب المثال تھی اب تو

تمھارے ہجر کا موسم نڈھال رکھتا ہے

اگرچہ اپنی زباں سے وہ کچھ نہیں کہتا

مگر نگاہ میں کتنے سوال رکھتا ہے

جو ہمسفر ہوں تو ہر بات مشترک ٹھہری

شریکِ لطف شریکِ ملال رکھتا ہے

تمھارے قرب کا احساس ہی تو ہے جاناں

جو مشکلات میں مجھ کو سنبھال رکھتا ہے

جدائیوں کی تپش میں مدام کیوں نہ جلے

انا کی آگ جو سینے میں پال رکھتا ہے

خودی کا پاس کروں یا تمھارے پاس آؤں

دلوں کا فیصلہ الجھن میں ڈال رکھتا ہے

حد کمال کو منزل گماں نہ کر شازی

کمال خود بھی تو خوفِ زوال رکھتا ہے

شہناز شازی

*************

yeh dunia dari bhi kitni ajeeb shay hai miyan : poet dr. waqar khan

ڈاکٹر وقار خان

 یہ دنیا داری بھی کتنی عجیب شے ہے میاں  

 خدا کو یاد کیا جاتا ہے مفاد کے وقت  

  

یہ میرے شعر ہمیشہ ہوئے نظر انداز 

 بس اک غرور بھری خامشی تھی داد کے وقت

تجھے یہ لگتا ہے کہ میرا پیار جھوٹا ہے ؟

 خدا بھی یاد نہیں ہوتا تیری یاد کے وقت

بس ایک خون میرے سر پہ ہو چکا تھا سوار 

 تمیزِ مشرک و مومن نہ تھی جہاد کے وقت 

ہمارا پیار تو ہونا تھا شک کی نذر وقار

 کہ رہ گیا تھا خلاء کوئی اعتماد کے وقت  

ڈاکٹر وقار خان

*************