kiu chup hain? ehtamaam se kuch boliye huzoor : poetess anita yaqoob

انیتا یعقوب 

کیوں جُپ ہیں ؟ اہتمام سے کجھ بولیے حضور !

دھڑکن تھمی ہے شام سے کچھ بولیے حضور !

کجھ بولیے حضور فقط میرے واسطے

جاہے ' خود اپنے کام سے کچھ بولیے حضور !

خوش بُو چُرا رہی ہے گل ِ یاسمین کی !

اس بادِ خوش خرام سے کچھ بولیے حضور !

اس بزم شب میں آپ ہی تو خاص ِ بزم ہیں 

ہم لوگ تو ہیں عام سے کچھ بولیے حضور !

آنکھوں میں اشک پانو میں زنجیر پڑ گئی

گھبرا رہے ہیں شام سے کچھ بولیے حضور !

انیتا یعقوب 

*************

husn e saada ka vaar ankhen hain : poetess foziya rabab

فوزیہ رباب

حسنِ سادہ کا وار آنکھیں ہیں 

بن ترے بیقرار آنکھیں ہیں

میری جانب ہے جو ترا چہرہ

میری جانب ہزار آنکھیں ہیں

عیب تیرا کہاں چھپے گا اب

شہر میں بے شمار آنکھیں ہیں

میں نے طرز وفا تھا اپنایا

اس لئے اشکبار آنکھیں ہیں

پارسائی کہاں گئی؟ بولو!

آج کیوں داغدار آنکھیں ہیں؟

ایک نقشہ تھا خواب کا کھینچا

اس لئے تار تار آنکھیں ہیں

جیسے ان میں سحاب رہتے ہوں 

کتنی زار و قطار آنکھیں ہیں

جن کی تعبیر میں ملے وحشت 

ایسے خوابوں پہ بار آنکھیں ہیں

وہ جو چہرہ ہی پڑھ نہیں سکتیں

کتنی جاہل گوار آنکھیں ہیں

وہ نظر آر پار ہوتی ہے

ہائے کیا دلفگار آنکھیں ہیں

خواب دیکھا رباب نے کیونکر

اس لئے سوئے دار آنکھیں ہیں

فوزیہ رباب

*************

kaheen pe girtay huye aor kaheen sambhaltay huye : poet adnan asar

عدنان اثر

کہیں پہ گرتے ہوئے اور کہیں سنبھلتے ہوئے 

میں اُس کے شہر کو جاؤں گا یوں ہی چلتے ہوئے

 خدا کرے وہ کِسی روز مُجھ کو مِل جائے 

 کِسی گلی میں بڑے چین سے ٹہلتے ہوئے 

 میں انکے نور میں پہنچا غریب خانے تک 

 کسی نے پھینک دیے تھے چراغ جلتے ہوئے

 یہ میں نہیں ہوں کوئی مجھ سا ہے میرے اندر 

 یہ آئینہ جو دِکھاتا ہے رخ بدلتے ہوئے

 ہمارے دل میں دَبا عشق کُھل گیا آخر

 کِسی نے دیکھ لیا تھا دُھواں نکلتے ہوئے

 جو مدتوں سے سرِ طاق جل رہا تھا اثر 

 پھر اُس چراغ کو دیکھا دُھواں اگلتے ہوئے

عدنان اثر

*************

kya kahon jo hai mere dil main utarne wala : poet aasim hijazi

عاصم حجازی

 کیا کہوں جو ہے مرے دل میں اترنے والا

بال و پر بھی ہے وہی میرے کترنے والا

اپنی برباد اُمیدوں کا کوئی رنج نہیں

دل کا دامن ہی نہیں خوشیوں سے بھرنے والا

مُشت بھر خاک ہو خود پر نہ کبھی ناز کرو

چار دن پھول بھی کھلتا ہے بکھرنے والا

وقتِ رُخصت یوں تجھے دل نے تڑپ کر دیکھا

جیسے حسرت سے تکے جاں سے گزرنے والا

کیا اُے پاسِ وفا یاد دلاؤں عاصم

وہ جو ہر بات سے اپنی ہے مکرنے والا

عاصم حجازی

*************

maheen khadija k chand ashaar

ماہین خدیجہ

 یہ واقعہ بھی کسی سانحے سے کم تو نہیں 

چراغ لے کے کوئی روشنی کی سمت چلا

*************

مرے شعور نہیں، لاشعور میں تم  ہو

بغیر سوچے بھی تم کو ہی سوچتی ہوں میں

*************

میں نے کہا کہ چاند سے باتیں کرونگی میں

اس نے کہا پھر آئینے کے روبرو رہو

*************

کیا پہلے مقید اپنی آنکھوں میں اسے میں نے

اٹھائی پھر حسیں کاجل کی یہ دیوار رستے میں

*************

زخم تو سارے چھپا لےگا میرا جسم مگر

یہ میری روح کے آزار اگر بول پڑے

*************

آنکھ کے پانیوں میں ڈوبا ہے

ھائے اس شوخ کا حسیں چہرہ

*************

جاگ کر رات کاٹ دی میں نے

آج پھر خواب کھو گیا میرا

*************

میں چاہتی ہوں مری بات تجھ تلک پہنچے

میں چاہتی ہوں تعلق کا راستہ نکلے 

*************

یہ جو آنکھوں میں تصّور سا ترا رہتا ہے

اس کو تصویر بنا لوں تو برا ہی کیا ہے

*************

میں نے بس دل کی بات کہہ دی تھی

تم، مجھے شاعرہ سمجھ بیٹھے 

*************

ماہین خدیجہ

is pe shikwa to ae khuda nahi hai : poet najeeh uddin yasim

نجیح الدین یاسم

اس پہ شکوہ تو اے خدا نہیں ہے 

ہاں جو چاہا تھا وہ ملا نہیں ہے

غیر کا عکس تیری آنکھوں میں 

ایسے ملنے کا حوصلہ نہیں ہے

اس کی آنکھیں سنوار دیتی ہیں

اب مرے گھر میں آئینہ نہیں ہے

جس کا معمول تھا مرا دیدار

اب پلٹ کر بھی دیکھتا نہیں ہے

زندگی بس فراقِ یار پہ رک 

آگے جانے کا راستہ نہیں ہے 

اس طرح ایک دم نہیں ہوتا 

ہجر ہے کوئی حادثہ نہیں ہے 

یہ عجب شہر ہے یہاں یاسم 

کوئی بھی درد آشنا نہیں ہے

یاسم 

*************

rang o ras ki hawas aor bas : poet ammar iqbal

عمار اقبال

رنگ و رس کی ہوس اور بس

مسئلہ دسترس اور بس

یوں بُنی ہیں رگیں جسم کی

ایک نس ٹس سے مس اور بس

سب تماشائے کن ختم شد

کہہ دیا اس نے بس اور بس

کیا ہے مابینِ صیاد و صید

ایک چاکِ قفس اور بس

اس مصور کا ہر شاہکار

ساٹھ پینسٹھ برس اور بس

عمار اقبال

*************

میں نے چاہا تھا زخم بھر جائیں

زخم ہی زخم بھر گئے مجھ میں

عمار اقبال

*************

hath thamay charagh e tanhayi : poetess fahmida kosar fahmi

فہمیدہ کوثر فہمی

ہاتھ تھامے چراغِ تنہائی

مجھ سے ملنے حیات میں آئی

بیتے لمحوں کو ڈھونڈتا ہے دل

دور بجنے لگی ہے شہنائی

اپنے انجام سے تو واقت تھا

جس نے ٹھوکر بھی جا بجا کھائی

جس پہ بیتی وہ جانتا ہے اسے

جس نے یادوں کی زُلف لہرائی

پھر اُداسی کا آ گیا موسم

فہمی بھولی سی بات یاد آئی

فہمیدہ کوثر فہمی

*************

jaan ik meri jaan main royi : poet shahbaz malik yadish

شہبازیادش

جان اک  میری  جان  میں  روئی 

 شش جہت سی دھیان میں روئی

ہائے وہ ایک  بھی نہیں  سمجھا 

آنکھ کس  کس زبان  میں  روئی 

جی یہ اپنا ہی بھر نہ آوے کیوں  

آ  کے  تنہائی    کان  میں   روئی 

وے قسم  ہے کہ ڈھے  گیا   سنیو 

داستاں  جس  مکان   میں  روئی 

ہم   نے  دانستہ  گھر  ڈبویا   ہے 

یعنی  پستی  ڈھلان   میں  روئی 

  

تیر ہنستا  ہے دیکھ  کر مجھ  کو 

میری  چھاتی  کمان   میں  روئی

پہلے مجنوں کو روتے دیکھوں تھا 

آج    لیلٰی    گمان    میں    روئی

سنگ   فرہاد  پر  ہیں  خندہ  گل

کوئی  شیریں  چٹان  میں   روئی 

تاکِ  یادش میں  اک  تھکی  ہاری  

حور    باب   الریان    میں   روئی  

شہبازیادش